काठमाडौं( एजेन्सी)। विश्वको सबैभन्दा अग्लो बिल्डिङ बुर्ज खलिफा स्टिल र सिमेन्टबाट बनेको छ । तर, स्विट्जल्याण्डमा एउटा यस्तो अग्लो भवनको निर्माण भइरहेको छ, जसमा न स्टिल प्रयोग भएको छ, न सिमेन्ट नै । काठबाट बन्न लागेको यो अग्लो बिल्डिङको निर्माण कार्य सुरु भइसकेको छ । 

ज्युरिचबाट प्रकाशित हुने पत्रपत्रिकाका अनुसार ज्युरिच नजिकको विन्टरथुर शहरमा काठ मात्र प्रयोग गरेर एक सय मिटर अर्थात ३ सय २८ फिट अग्लो बिल्डिङको निर्माण धमाधम भइरहेको छ ।  नेपाललगायत अन्य देशमा घरको झ्याल र ढोका बनाउन मात्र काठ प्रयोग हुने गरेको छ। तर, स्विट्जरल्याण्डमा गगनचुम्बी घर बनाउन पुरै काठ प्रयोग हुन लागेको हो। 

पत्रपत्रिकामा उल्लेख भएअनुसार बिल्डिङको निर्माणको ठेक्का डेनिस फर्म ‘स्मिट ह्यामर लासेन आर्किटेक्ट्स’ ले प्राप्त गरेको छ । यही कम्पनीले बिल्डिङको डिजाइन पनि गरेको हो। यो प्रोजेक्टको नाम ‘रकेट एण्ड टाइगर्ली’ राखिएको छ। । बिल्डिङ पुरै वातावरणमैत्री भएको डेनिस फर्मको दावी छ । बिल्डिङको पिलरदेखि छतसम्म सबै ठाउँमा काठ प्रयोग भएको छ। यसको निर्माण कार्य सन् २०२६ सम्म पुरा भइसक्ने पत्रिकामा उल्लेख छ । 

निर्माण कम्पनी डेनिस फर्मले स्विस आर्किटेक्चर स्टुडियो कमेटी ट्रफर होडलसँग मिलेर बिल्डिङको डिजाइन तयार पारेको बताएको छ । उसले काठको ४ वटा भवन तयार हुने, जसमा टावरको लम्बाई सय मिटर रहेको जानकरी दियो । बिल्डिङमा सबै किसिमको सुविधा उपलब्ध हुने छन्। यसभित्र गार्डेन, जिम, रेस्टुरेन्ट, स्काइ बार, पसल र होटल हुनेछ। केटाकेटीका लागि खेल्ने स्थान पनि यथेस्ट हुनेछन् ।  

डिजाइनर डेनिस फर्मले काठको भवन बनाउँदा थुप्रै फाइदा हुने बतायो। ‘निर्माण कार्य छिटो हुनेछ। कंक्रिट भवन बनाउँदा धेरै समय खर्च हुन्छ,’ फर्मले भनेको छ। उसले कंक्रिट र स्टिलको भवन तयार पार्दा त्यसले वातावरणलाई निकै नोक्सान हुने र प्रदूषण पनि बढ्ने बताउँदै काठको भवनले धेरै आयाम बोकेको जनाएको छ । विश्वमा कंक्रिट ८ प्रतिशत र स्टिल ५ प्रतिशत कार्बन उत्सर्जनको कारण बन्ने गरेको छ । 

पछिल्लो समय विश्वका ठूला देशहरूमा काठको बिल्डिङ बन्ने क्रम बढ्दो छ । अमेरिकाको मिनेपोलिसमा काठको १८ तल्ले भवन निर्माण भएको छ । यस्तै, अस्ट्रियामा पनि काठको टावर निर्माण भएको छ । यसको नाम नै होहो टावर राखिएको छ। स्विडेनको राजधानी स्टोकहोममा पनि काठको गगनचुम्बी भवन निर्माण भएको छ। चीनको गुइझोई प्रान्तको यिङशान शहरमा पनि २४ तल्ले भवन निर्माण गरिएको छ।