वासिङ्टन। यसै महिनाको अन्त्यमा हुन गइरहेको २०२६ फिफा विश्वकपका लागि आधिकारिक म्याच बलहरूमा मोसन सेन्सर जडान गरिनेछ र प्रत्येक खेलअघि तिनलाई चार्ज गर्नुपर्नेछ।

यस विश्व फुटबल च्याम्पियनसिपका लागि म्याच बल उत्पादन गर्ने कम्पनी एडिडासको रिपोर्टलाई उद्धृत गर्दै न्यूजवीक म्यागजिनले लेखेको छ- 'बलभित्र एउटा ५०० हर्जको इनर्सियल मेजरमेन्ट युनिट मोसन सेन्सर चिप रहेको छ, जसलाई एउटा सस्पेन्सन प्रणालीले आफ्नो स्थानमा अड्याएर राख्छ। यसले डाटा संकलन गरी भीएआर (भिडियो असिस्टेन्ट रेफ्री) प्रणालीमा पठाउँछ।'

रिपोर्टमा अगाडि भनिएको छ, 'यसका सेन्सरहरूले प्रत्येक टचलाई ट्र्याक गर्नेछन् र सम्भावित अफसाइड, ह्यान्डबल र अन्य सामान्य घटनाहरूका बारेमा निर्णय लिन मद्दत गर्न सक्नेछन्। यी हाइ-टेक बलहरूलाई विशेष रूपमा तयार पारिएका चार्जिङ स्टेसनहरू मार्फत वायरलेस रूपमा चार्ज गरिन्छ। खेलको समयमा सक्रिय रूपमा प्रयोग गर्दा करिब ६ घण्टासम्म धान्ने गरी पूर्ण क्षमतामा चार्ज हुन यसलाई लगभग ९० मिनेट लाग्छ।'

प्राविधिक नवप्रवर्तनका बारेमा थप विवरण दिँदै न्यूजविकले एडिडासका प्रवक्तालाई उद्धृत गर्दै भनेको छ- 'पूरा खेल र त्योभन्दा बढी समयसम्म पनि उत्कृष्ट कार्यसम्पादन सुनिश्चित गर्नका लागि खेल हुने दिन रंगशालामा प्रत्येक बललाई खेल हुनुअघि एउटा विशेष क्रैडलमा चार्ज गरिन्छ। यसमा जडान गरिएका ब्याट्रीहरू उच्च स्तरका छन्, जसले गर्दा यिनीहरू शीर्ष स्तरको खेलको अवधिभन्दा धेरै गुणा बढी समयसम्म टिक्न सक्छन्।'

प्रवक्ताले थप प्रष्ट पार्दै भनेका छन्- 'परीक्षणकालभरि र हामीले अहिलेसम्म सेवा प्रदान गरेका दुईवटा फिफा विश्वकप प्रतियोगिताहरू तथा युइएफए युरो २०२४ र २०२५ मा, ब्याट्री कम भएको कारणले हामीले बल बदल्नु परेको कुनै पनि अवस्था आएन।'

सन् २०२२ मा कतारमा भएको अघिल्लो फिफा विश्वकपका क्रममा पनि यस्तै हाइ-टेक बल प्रयोग गरिएको थियो। यद्यपि '२०२२ को विश्वकप बलको विपरीत, २०२६ को सिरिजमा सेन्सर बलको केन्द्रमा नभई बलको साइडमा राखिएको छ।' कतारमा भएको विश्व फुटबल च्याम्पियनसिप अघि एडिडासले रिपोर्ट गरेको थियो कि चार वर्ष पहिले बलमा भएको सेन्सर रिचार्ज गर्न मिल्ने ब्याट्रीबाट चल्थ्यो, जसलाई इन्डक्सनद्वारा चार्ज गरिएको थियो।

२०२६ फिफा विश्वकप जुन ११ देखि जुलाई १९ सम्म क्यानडा, मेक्सिको र संयुक्त राज्य अमेरिकाले संयुक्त रूपमा आयोजना गर्दैछन्। यी तीन देशका १६ वटा शहरमा खेलहरू सञ्चालन हुनेछन्। अघिल्लो ३२-टोलीको ढाँचाको सट्टा ४८ टोलीहरू सहभागी हुने यो पहिलो फिफा विश्वकप हुनेछ।