आजको व्यस्त जिन्दगीमा महिलाहरूले घर, जागिर र परिवारको जिम्मेवारी एकसाथ सम्हाल्छन्। यस्तो अवस्थामा आफ्नो स्वास्थ्यको ख्याल राख्नु निकै जरुरी हुन्छ। सही खानपानले शरीरलाई स्वस्थ राख्न सबैभन्दा ठूलो भूमिका खेल्छ। कतिपय अवस्थामा महिलाहरू पोषणको कमी, थकान, कमजोरी र हार्मोनल समस्याहरूबाट हैरान हुन्छन्। यस्तोमा फर्सीको बियाँ एउटा उत्कृष्ट र पौष्टिक विकल्प साबित हुन सक्छ। 

फर्सीको बियाँ साना पक्कै हुन्छन्, तर यिनीहरूमा प्रचुर मात्रामा पोषक तत्वहरू पाइन्छन्, त्यसैले यिनीहरूलाई सुपरफूड पनि भनिन्छ। फर्सीको बियाँमा प्रोटिन, फाइबर, आइरन, म्याग्नेसियम, जिंक, एन्टिअक्सिडेन्ट र हेल्दी फ्याट (स्वस्थ बोसो) हुन्छन्, जुन महिलाहरूको स्वास्थ्यका लागि निकै फाइदाजनक छन्। दैनिक रूपमा थोरै मात्रामा फर्सीको बियाँ खाँदा शरीरलाई धेरै फाइदा पुग्छ। महिलाहरूका लागि फर्सीको बियाँ विशेष रूपमा किन फाइदाजनक छ, यस्तो छ लाभ।

पोषक तत्वले भरिपूर्ण फर्सी

फर्सीको बियाँमा धेरै आवश्यक भिटामिन र मिनरल्स पाइन्छन्। यसमा म्याग्नेसियम, आइरन, जिंक, फस्फोरस र कपर प्रचुर मात्रामा हुन्छन्। यी सबैले शरीरलाई बलियो र स्वस्थ बनाउन मद्दत गर्छन्।

म्याग्नेसियमले शरीरको मांसपेशी र नसाहरूलाई सही तरिकाले काम गर्न मद्दत गर्छ। यो राम्रो निद्रा लाग्न र तनाव कम गर्न पनि सहयोगी हुन्छ। आइरनले शरीरमा रगतको कमी हुन दिँदैन। महिलाहरूमा प्रायः आइरनको कमी देखिन्छ, विशेष गरी महिनावारीको समयमा। यस्तो अवस्थामा फर्सीको बियाँ फाइदाजनक साबित हुन सक्छ।

जिंकले रोग प्रतिरोधात्मक क्षमता बढाउँछ र छाला तथा कपाललाई स्वस्थ राख्छ। त्यसैले फर्सीको बियाँ महिलाहरूका लागि निकै उपयोगी मानिन्छ।

फर्सीको बियाँ हार्मोनलाई सन्तुलित राख्न सहयोगी

महिलाहरूले जीवनको विभिन्न चरणहरूमा हार्मोनल परिवर्तनहरूको सामना गर्नुपर्छ। महिनावारी, गर्भावस्था र मेनोपज (महिनावारी सुक्ने समय) मा हार्मोन असन्तुलित हुन सक्छ। यसले गर्दा मुड स्विङ (मूड बदलिरहने), थकान र झर्को लाग्ने जस्ता समस्याहरू हुन सक्छन्।

फर्सीको बियाँमा हेल्दी फ्याट र फाइटोएस्ट्रोजेन पाइन्छन्, जसले हार्मोनलाई सन्तुलित राख्न मद्दत गर्छ। यसमा भएको म्याग्नेसियमले महिनावारी हुनु अघि देखिने समस्याहरू जस्तै– पेट दुख्ने, टाउको दुख्ने र कमजोरीलाई कम गर्न मद्दत गर्छ।

मेनोपजका अवधिमा महिलाहरूमा निद्राको समस्या र अचानक गर्मी महसुस हुने समस्या हुन्छ। फर्सीको बियाँ यी समस्याहरूलाई कम गर्न सहयोगी हुन सक्छ।

मुटुलाई स्वस्थ राख्छ 

आजभोलि महिलाहरूमा पनि मुटुको रोग तीव्र रूपमा बढिरहेको छ। तनाव, गलत खानपान र शारीरिक गतिविधिको कमी यसको मुख्य कारण हो। फर्सीको बियाँले मुटुलाई स्वस्थ राख्न मद्दत गर्छ।

फर्सीको बियाँमा पाइने एन्टिअक्सिडेन्ट र हेल्दी फ्याटले खराब कोलेस्ट्रोललाई कम गर्न र रक्तचापलाई नियन्त्रण गर्न सहयोग गर्छ। यसले शरीरको सुजनलाई कम गर्छ र रक्तधमनीहरूलाई सुरक्षित राख्छ, जसले गर्दा मुटु स्वस्थ रहन्छ।

वजन नियन्त्रण गर्न सहयोगी

धेरै महिलाहरू तौल बढ्ने समस्याले चिन्तित हुन्छन्। हार्मोनल परिवर्तन र गलत खानपानका कारण तौल तीव्र रूपमा बढ्न सक्छ। फर्सीको बियाँले वजन नियन्त्रण गर्न मद्दत गर्न सक्छ।

फर्सीको बियाँमा प्रोटिन र फाइबर प्रचुर मात्रामा हुन्छ, जसले गर्दा पेट लामो समयसम्म भरिएको महसुस हुन्छ। यसले पटक–पटक भोक लाग्दैन र धेरै खाने बानी कम हुन्छ। फर्सीको बियाँले ऊर्जा पनि दिन्छ, जसले शरीरलाई दिनभर सक्रिय राख्छ। यसलाई स्वस्थ खाजाको रूपमा खान सकिन्छ।

हड्डी बलियो बनाउँछ 

महिलाहरूमा उमेर बढ्दै जाँदा हड्डीहरू कमजोर हुन थाल्छन्। विशेष गरी मेनोपजपछि अस्टियोपोरोसिसको जोखिम बढ्छ। फर्सीको बियाँले हड्डीलाई बलियो बनाउन मद्दत गर्छ।

यसमा म्याग्नेसियम, फस्फोरस र जिंक जस्ता तत्वहरू हुन्छन्, जुन हड्डीका लागि आवश्यक छन्। म्याग्नेसियमले शरीरमा क्याल्सियमको सही उपयोग गर्न मद्दत गर्छ। यसले हड्डी मजबुत रहन्छ र भाँचिने खतरा कम हुन्छ।

छाला र कपालका लागि फाइदाजनक

हरेक महिला आफ्नो छाला चम्किलो र कपाल स्वस्थ होस् भन्ने चाहन्छन्। फर्सीको बियाँले छाला र कपालको स्वास्थ्यलाई राम्रो बनाउन मद्दत गर्छ। यसमा भिटामिन ई र एन्टिअक्सिडेन्ट पाइन्छन्, जसले छालालाई नोक्सान पुर्‍याउने फ्री रेडिकल्सबाट जोगाउँछ। यसले छालालाई चम्किलो र स्वस्थ राखिरहन्छ। फर्सीको बियाँमा पाइने जिंक र हेल्दी फ्याटले कपाललाई बलियो बनाउँछ र कपाल झर्ने समस्या कम गर्न मद्दत गर्छ।

रोग प्रतिरोधात्मक क्षमतामा वृध्दि

कमजोर इम्युनिटीका कारण महिलाहरू चाँडै बिरामी पर्न सक्छन्। फर्सीको बियाँले शरीरको इम्युनिटी बढाउँछ। यसमा भएको जिंक र एन्टिअक्सिडेन्टले शरीरलाई इन्फेक्सन (संक्रमण) बाट जोगाउन मद्दत गर्छ।

नियमित रूपमा फर्सीको बियाँ खाँदा शरीर बलियो रहन्छ र बिरामी हुने खतरा कम हुन्छ। फर्सीको बियाँमा हुने आइरन र प्रोटिनका कारण शरीरमा ऊर्जा कायम रहन्छ र थकान कम महसुस हुन्छ।

फर्सीको बियाँको सबैभन्दा राम्रो पक्ष यो हो कि यसलाई सजिलैसँग खानामा समावेश गर्न सकिन्छ। यसलाई काँचै वा हल्का भुटेर खान सकिन्छ। महिलाहरूले यसलाई सलाद, दही, ओट्स, स्मूदी वा सूपमा हालेर खान सक्छन्। तर, फर्सीको बियाँ सीमित मात्रामा मात्र खानुपर्छ। दैनिक एक मुट्ठी फर्सीको बियाँ पर्याप्त मानिन्छ।

फर्सीको बियाँ साना हुन्छन्, तर यसका फाइदाहरू निकै ठूला छन्। दैनिक थोरै मात्रामा फर्सीको बियाँ खाँदा शरीरलाई आवश्यक पोषण मिल्छ र महिलाहरूले आफूलाई बढी स्वस्थ, ऊर्जावान र सक्रिय महसुस गर्न सक्छन्। त्यसैले हरेक महिलाले आफ्नो डाइटमा फर्सीको बियाँ अवश्य समावेश गर्नुपर्छ। (स्वास्थ्य एजेन्सीबाट)