ढाका । बंगलादेशको चुनावमा शानदार जीतपछि अब बंगलादेश नेशलिस्ट पार्टी (बिएनपी) का अध्यक्ष तारिक रहमान देशको आगामी प्रधानमन्त्री बन्न तयार छन्। बिहीबार सम्पन्न देशको १३औँ राष्ट्रिय चुनावमा बिएनपीले ठूलो जीत हासिल गरेको छ।

१७ वर्षको स्वनिर्वासन पछि गत डिसेम्बर २५ मा स्वदेश फर्किएका तारिक रहमानले आफूलाई कुशल नेतृत्वको रूपमा प्रमाणित गरेका छन्। बंगलादेश चुनावको अनौपचारिक नतिजा अनुसार, तारिक रहमानले ढाका-१७ र बोगुरा-६ दुवै क्षेत्रबाट जीत हासिल गरेका छन्।

भारतीय प्रधानमन्त्री नरेन्द्र मोदीले रहमानलाई उनको ठूलो जीतका लागि बधाई दिएका छन् र एक लोकतान्त्रिक, प्रगतिशील र समावेशी बंगलादेशलाई समर्थन गर्ने प्रतिबद्धता व्यक्त गरेका छन्।

तारिक रहमानको नेतृत्वमा बीएनपीको पुनरागमन

तारिक रहमानको नेतृत्वमा बंगलादेश नेशनालिस्ट पार्टीले देशको ३०० संसदीय सीटमध्ये २९२ मा चुनाव लड्यो। बाँकी सीटहरू यसले आफ्ना सहयोगी दलहरूसँग बाँडेको थियो। बीएनपीको सामना देशको सबैभन्दा ठूलो इस्लामिक पार्टी जमात-ए-इस्लामीको नेतृत्वमा रहेको ११ दलीय गठबन्धनसँग थियो। तर मतदानभन्दा करिब डेढ महिनाअघि देश फर्किएका तारिक रहमानले पार्टीमा नयाँ उर्जा भरे र यसलाई प्रचण्ड बहुमतसम्म पुर्‍याए ।

बंगलादेशको प्रमुख अंग्रेजी सञ्चारमाध्यम 'द डेली स्टार' को रिपोर्ट अनुसार, बीएनपी नेतृत्वको गठबन्धनले अनौपचारिक नतिजामा १८१ सीटमा जित हासिल गरेको छ। यो संख्या बहुमतका लागि आवश्यक १५१ को आँकडाभन्दा धेरै अगाडि छ। यसको मुख्य प्रतिद्वन्द्वी रहेको जमात नेतृत्वको गठबन्धनले ६१ सीट मात्र प्राप्त गर्न सकेको छ। इस्लामी आन्दोलनले केवल एक सीट पाएको छ भने अन्यले ६ सीट जितेका छन्। यी आँकडाहरू शुक्रबार बिहान १० बजेसम्मका हुन्।

को हुन् तारिक रहमान ?

तारिक रहमान बंगलादेशका पूर्व राष्ट्रपति जनरल जियाउर रहमान र तीन पटक देशको प्रधानमन्त्री बनेकी बेगम खालिदा जियाका जेठा छोरा हुन्। उनी विगत १७ वर्षदेखि निर्वासनमा लण्डनमा बसिरहेका थिए र २५ डिसेम्बर २०२५ मा ढाका फर्किएका थिए। देश फर्किएको केही समयपछि बिरामी रहेकी खालिदा जियाको निधन भयो र रहमानलाई बीएनपीको प्रमुख चुनियो। यसअघि उनले कार्यवाहक अध्यक्षको रूपमा काम गरिरहेका थिए।

ढाकाको 'डार्क प्रिन्स'

तारिक रहमानलाई बीएनपीको ुडार्क प्रिन्सु भनिन्छ। सन् २००५ मा अमेरिकी विदेश मन्त्रालयको एक केबल (गोप्य पत्र) मा रहमानलाई यो नामले सम्बोधन गरिएको थियो, जसलाई पछि विकिलिक्सले सार्वजनिक गरेको थियो। उक्त केबलमा बंगलादेशभित्र राजनीतिक विरोधीहरू विरुद्धको हिंसामा तारिक रहमानको संलग्नता रहेको उल्लेख गरिएको थियो। सन् २००१ देखि २००६ सम्म बीएनपी र जमात-ए-इस्लामी गठबन्धनको सरकार हुँदा खालिदा जिया प्रधानमन्त्री थिइन्, तर वास्तविक शक्ति रहमानकै हातमा रहेको मानिन्थ्यो।

रहमानले त्यस समयमा 'हावा भवन' बाट काम गरिरहेका थिए, जसलाई  छायाँ प्रधानमन्त्री कार्यालय भनिन्थ्यो। यो एउटा दुई तले भवन थियो। अहिले रहमान पुनः पूर्ण शक्तिका साथ सत्ताको वास्तविक मालिकका रूपमा फर्किँदै गर्दा धेरै मानिसहरूमा पुरानो समय दोहोरिने आशंका बढेको छ।

सन् २००६ देखि २००८ सम्मको समय हिंसात्मक अशान्तिले भरिएको थियो। यसै क्रममा एक चुनावी सरकार आयो जसले मे २००७ मा रहमानलाई पक्राउ गर्‍यो। तारिक रहमानलाई विभिन्न आरोपमा १७ महिनासम्म हिरासतमा राखियो। यस अवधिमा रहमानलाई यातना दिइएको कुरा पनि बाहिर आएको थियो। हालै एक पूर्व सेना प्रमुखले बंगलादेशको अन्तर्राष्ट्रिय अपराध न्यायाधिकरणमा दिएको बयानमा यसको जानकारी दिएका थिए। उनलाई मनी लाउन्ड्रिङ लगायत धेरै मुद्दामा दोषी ठहर गरिएको थियो। शेख हसिनाको हत्याको षड्यन्त्रको मामिलामा पनि उनलाई दोषी पाइएको थियो। तर सन् २०२४ मा विद्यार्थी विद्रोहपछि शेख हसिनाको सत्ता पतन भएसँगै उनी विरुद्धका फैसलाहरू उल्ट्याइए।