एकजना वरिष्ठ पत्रकार नै अभिव्यक्तिबाट वञ्चित!

काठमाडौं। देशका एकजना वरिष्ठ पत्रकार नै अभिव्यक्ति स्वतन्त्रताबाट वञ्चित छन् भनेको सुन्दा पत्यार नलाग्न सक्ला। उनको अभिव्यक्ति स्वतन्त्रतामाथि गम्भीर आघात पर्दा सरोकारवाला निकाय मौनता साँधेर बसेका छन् भन्दा विश्वास लाग्ने कुरै भएन। झट्ट सुन्दा पत्यार नलागे पनि सत्य के हो भने पचपन्न वर्षदेखि निरन्तर पत्रकारितामा सक्रिय ती पत्रकार करिब डेढ महिनादेखि सामाजीक सञ्जालका सबै माध्यमबाट वञ्चित छन्।  

यसरी गरियो अवरोध

अघिल्लो महिना अक्टोबर २५ (कार्तिक ६) मा पत्रकार किशोर नेपालको फेसबूक अचानक बन्द भयो। सोधखोज गर्दा ह्याक भएको थाहा भयो। यसबारे उनले विज्ञहरुसँग परामर्श गरे ह्याक भएको उनीहरुले बताए। तर समस्या समाधान हुन सकेन। त्यसपछि केही दिनभित्रै ट्वीटर एकाउन्ट पनि चल्न छोड्यो। त्यसको केही दिनमा इन्स्टाग्राम समेत बन्द भयो। यसपछि पत्रकार नेपाल सामाजीक सञ्जालको सम्पर्कबाट पूरै वञ्चित भए।

सरकारी निकाय मौन

पत्रकार नेपाल त्यसपछि नेपाल प्रहरीको साईबर व्यूरो पुगे र त्यहाँ आफ्नो समस्या मौखिक र लिखित रुपमै जानकारी गराए। व्यूरोका अधिकारीले महानिरीक्षकलाई समेत जानकारी गराईदिने वचन दिए तर त्यसपछि त्यसबारेमा कुनै प्रगति भएको सूचना भने दिएनन्। 

पत्रकार नेपालले विभागीय सरोकार राख्ने मन्त्रीहरु गृहमन्त्री बालकृष्ण खाण र सूचना तथा सञ्चार प्रविधि मन्त्री ज्ञानेन्द बहादुर कार्कीलाई पनि यसबारे अवगत गराए। तर त्यताबाट पनि कुनै चासो राखेको देखिएन। अरु त अरु समस्याको पूर्ण विवरण पाएर पनि काठमाडौंका प्रमुख जिल्ला अधिकारीले पनि यसबारे अनुसन्धान गर्ने रुचि देखाएनन्।

यतिसम्म त भैसकेकै थियो, पत्रकार नेपालको ९८०२०३१८८१ नम्बरको मोवाईल नम्बर निर्वाचनको दुइदिन अघि बन्द गरियो। त्यसपछि उनको इमेल आइडीलाई समेत अवरुध्द गरिएको जानकारी प्राप्त भएको छ।

पत्रकार नेपालले सामाजीक सञ्जालका आफ्ना सबै एकाउन्टहरु, फोन र इमेल समेत बन्द गरिएकोमा आश्चर्य व्यक्त गरेका छन्।

‘मलाई आश्चर्य लागिरहेको छ किन मलाई यसरी आक्रमण गरिएको हो’ पत्रकार नेपालले दृश्य टिभीसँग कुरा गर्दै भने,‘अभिव्यक्ति स्वतन्त्रतामाथि आघात पुर्याउन नयाँ शैली प्रयोग भएको छ, मलाई यसमा चिन्ता लागेको छ। यो डरलाग्दो संकेत हो।’ समयमै सूचना पाएर पनि सरकारका सरोकार निकाय उदासिन रहनुले आफूलाई आश्चर्य लागेको नेपालले सुनाए।

निर्वाचनका सन्दर्भमा तिखो विश्लेषण गर्दै सामाजीक सञ्जालमा समेत आफ्ना धारणा लेख्दै आएका पत्रकार नेपालको सामाजीक सञ्जाल प्रतिनिधिसभाको निर्वाचनको मुखमा आएर अवरुध्द गरिएकोले धेरैथरीका आशंका गर्ने ठाउँ दिएको छ। उनका विश्लेषणहरुमा राजनीतिक दल र स्वतन्त्र उम्मेदवारका कार्यकर्ताको संगठित प्रतिक्रिया आउने गरेको बुझिएको छ।

नेपाल पत्रकार महासंघका अध्यक्ष विपुल पोखरेलले महासंघका पूर्व सभापति किशोर नेपालको सामाजीक सञ्जाल अवरुध्द गरिएको कुरा सुनेर आफूलाई दुःख लागेको बताए। यसबारेमा बुझेर आवश्यक कदम चालिने अध्यक्ष पोखरेलले बताए।

वरिष्ठ पत्रकार नेपाल देशका लागि सुपरिचित नाम हो। उमेरले सात दशक टेकिसकेका उनको आधा शताव्दिदेखिको दैनिकी भनेको लेख्नु मात्र हो भन्ने कुरा सबै नेपालीले जानेका छन्। नेपाल पत्रकार महासंघको सभापति, प्रेस काउन्सिल नेपालको सदस्य र तत्कालिन प्रधानमन्त्री कृष्णप्रसाद भट्टराईको प्रेस सल्लाहकार रहीसकेका उनले नेपाल टेलिभिजन र गोरखापत्र संस्थानको नेतृत्व पनि गरिसकेका छन्। यसबाहेक पत्रकारितामा उनको सक्रियता र लेखकका रुपमा उनको विशेषताबारे नेपाली पाठक भलिभाँती जानकार छन्। 

 
 

प्रतिक्रिया