काठमाडौं। राष्ट्रिय स्वतन्त्र पार्टीको सरकारले फरक शैलीमा कुनै चर्चा नगरी विभिन्न निकायहरुमा नियुक्ति गरिरहेको छ। केही निकायमा नियुक्त व्यक्तिहरुका बारेमा त्यति धेरै टिकाटिप्पणी पनि भएका छैनन्। 

विगतका सरकारले यस्ता नियुक्ति गर्दा ठूलो चर्चा, होहल्ला र दौडधुप हुने गथ्र्यो। शक्ति केन्द्रहरुका आँगनमा बिचौलियाहरुको घम्साघम्सी भएका समाचारहरु आई नै रहन्थे। यसपाली त्यस्ता चर्चा सुन्न पाईएको छैन। नयाँ सरकारले यही शैलीमा उपयुक्त व्यक्तिलाई उपयुक्त स्थानमा जिम्मेवारी सुम्पदा जनमानसले मौन समर्थन गर्दो रहेछ भन्ने देखिएको छ। यतिमात्र कुरा हो कि सरकार यो शैलीलाई निरन्तरता दिन कतिसम्म समर्थ हुने छ।

नयाँ सरकार गठन भएको छोटो समयमै देखिएको यो मौन तर प्रभावकारी कार्यशैलीले नेपाली राजनीतिमा एउटा नयाँ र सकारात्मक मानक स्थापित गर्ने संकेत गरेको छ। विगतमा साना-तिना नियुक्तिमा पनि जुन खालको शक्ति संघर्ष, बिचौलियाको चलखेल र मिडियाबाजी हुने गर्थ्यो, त्यसको अन्त्य हुनु आफैँमा एउटा सुखद परिवर्तन हो।

सरकारको यो कदम र त्यसले दिइरहेको सन्देशले समाजमा सकारात्मक प्रभाव परिरहेको देखिन्छ।

सरकार लोकप्रियतावाद भन्दा परिणाममुखी शैलीमा काम गर्न चाहन्छ भन्ने संकेत सुरु भएको हो जस्तो लाग्दछ। विगतमा नियुक्ति हुनुअघि नै सम्भावित उम्मेदवारहरूको नाममा हुने व्यापक चर्चा र विवादले नियुक्त व्यक्तिलाई सुरुमै विवादास्पद बनाउँथ्यो। तर अहिले सरकारले हल्ला कम र काम धेरैको नीति अपनाएको देखिन्छ। यसले नियुक्ति पाउने व्यक्तिको योग्यतामाथि प्रश्न उठ्ने ठाउँ कम गरेको छ र उनीहरूलाई स्वतन्त्र रूपमा काम गर्ने वातावरण मिलेको छ।

सरकारको यस्तो कार्यशैलीले बिचौलियाको बिगबिगी र सेटिङको प्रभावमा कमी आउने निश्चित छ। विगतमा बिचौलियाहरूले शक्ति केन्द्रमा धाएर आफू अनुकूलका मानिस भर्ती गराउने होडबाजी हुन्थ्यो। अहिलेका नियुक्तिहरूमा जुन खालको छनौट देखिएको छ, त्यसले नातावाद र कृपावाद भन्दा पनि योग्यता र विज्ञतालाई प्राथमिकता दिएको सन्देश दिन्छ। यसले गर्दा स्वार्थ समूहहरू निराश भएका छन् भने आम नागरिकमा आशा पलाएको छ। यसले राजनीति संरक्षित सेटिङ संकटमा मात्र परेको होइन, यो धन्दामा आश्रित कैयौं व्यक्ति र राजनीतिक कार्यकर्तालाई घरको न घाटको बनाईदिएको छ।

प्रशासनिक र रणनीतिक नियुक्तिहरूमा उपयुक्त व्यक्ति छनौट हुनु भनेको सुशासनको पहिलो खुड्किलो हो। सरकारले धमाधम गरिरहेका कारबाहीहरूले कानुन सबैका लागि बराबर छ भन्ने सन्देश दिएको छ। विशेषगरी ठूला भनिएका काण्डहरूमा संलग्नलाई कानुनको दायरामा ल्याउने र नयाँ नियुक्तिमा पारदर्शिता अपनाउने कुराले सरकारको राजनीतिक इच्छाशक्ति बलियो रहेको देखाउँछ।

जब सरकारले बिना होहल्ला सही निर्णयहरू गर्छ, तब जनतामा एउटा मनोवैज्ञानिक शान्ति र भरोसा उत्पन्न हुन्छ। यसपटक केही हुन्छ कि भन्ने अपेक्षालाई यी मौन तर ठोस निर्णयहरूले मलजल गरेका छन्। विशेषगरी युवा पुस्ता र बौद्धिक तप्काले यस्तो कार्यशैलीलाई परिपक्व राजनीतिको रूपमा लिएका छन्।

सरकारको पहिलो हप्ताको यो शैलीले काम गर्नेले धेरै बोल्नु पर्दैन भन्ने कुरालाई चरितार्थ गरेको छ। यदि यो सिलसिला आगामी दिनमा पनि निरन्तर रह्यो र नियुक्ति पाएका व्यक्तिहरूले अपेक्षित नतिजा दिन सके भने, नेपालको सार्वजनिक प्रशासन र राजनीतिक नियुक्ति प्रक्रियामा यो एउटा ठूलो 'टर्निङ पोइन्ट' सावित हुन सक्छ। -फायल तस्बिर