काठमाडौं। केहीदिन यता लगातार वर्षा भैरहँदा तरकारीको मूल्यमा वृद्धि भएको छ। कालीमाटी फलफूल तथा तरकारी बजार विकास समितिले आज(आइतबार)का लागि फलफूल तथा तरकारीको सार्वजनिक गरेको मूल्य सूचीमा हरियो तरकारीको मूल्यमा वृद्धि भएको जनाईएको छ। 

सार्वजनिक मूल्य अनुसार च्याउ, गाजर, सागलगायतका हरियो तरकारीको मूल्य १० देखि ४० रुपैयाँसम्म प्रतिकेजी बढेको छ। आज रायो साग, हरियो प्याज, गाजर, रातो मूला, घिरौलाको मूल्य प्रतिकेजी १० रुपैयाँले बढेर आएको छ। तर, घिउ सिमीमा १० रुपैयाँ र लाम्चोभन्टामा प्रतिकेजी ५ रुपैयाँले मूल्य घटेको हो। 

बजारमा गोलभेँडाको न्युनतम मूल्य प्रतिकेजी १३० रुपैयाँ निर्धारण गरिएको छ। लोकल सानो गोलभेँडाको मूल्य भने स्थिर ६० रुपैयाँ रहेको छ। रातो आलुको न्यूनतम मूल्य ४८ रुपैयाँ, सुकेको प्याज भारतीय प्रतिकेजी ५६ रुपैयाँ र स्थानीय काउली ५० रुपैयाँ न्युनतम मूल्य निर्धारण गरिएको छ। 

त्यस्तै, कन्य च्याउमा प्रतिकेजी ४० रुपैयाँले भाउ बढेको छ। शनिबार १६० रुपैयाँ मूल्य रहेको सोहि च्याउ आज ४० रुपैयाँले बढर २०० पुगेको छ । गाजरको मूल्य प्रतिकेजी ११० रुपैयाँमा बिक्री भएको छ भने घिउ सिमी लोकल ५०, मुला रातो ५०, भन्टा लाम्चो ३०, मकै बोडी ७०, भटमासकोशा ९० रुपैयाँ तोकिएको छ। करेला ४०, लौका ४०, परवल ४४, घिरौला ३०, फर्सी पाकेको ५०, कन्ने च्याउ २००, डल्ले च्याउ ३३०, काँक्रो लोकल ४० रुपैयाँ प्रतिकेजीमा खरीद बिक्री भइरहेको छ। रायोको साग ९० रुपैयाँ मूल्य निर्धारण गरिएको छ। तोरीको साग प्रतिकेजी ३० रुपैयाँ हुँदा हरीयो प्याज १०० रुपैयाँ न्युनतम मूल्य कायम रहेको छ। 

समितिका अनुसार फलफूलको मूल्य हिजोको तुलनामा स्थिर रहेको छ। आज केरा दर्जनको १४० रुपैयाँ तोकिएको छ भने फूजी स्याउको मूल्य स्थिर प्रतिकेजी ३२० छ। कागती १३०, अनार ३००, आँप मालदह २२०, तरबुजा हरियो ७०, मौसम १६०, किवि ७००, मेवा ८० रुपैयाँ र नासपाति लोकल ७० रुपैयाँ प्रतिकेजी न्युनतम मूल्य तोकिएको छ। (नेपाल न्यूज बैंक)