भारत। के तपाईंलाई थाहा छ, संसारमा एउटा यस्तो टापु छ जहाँ बाहिरी मानिस पुग्न लगभग असम्भव छरु संसारमा घुम्न मन नलाग्ने मान्छे कमै होलान्। मानिसहरू पृथ्वीको हरेक ठाउँ घुम्न चाहन्छन्। सुन्दर समुद्र तटहरू, प्रेतवाधित ठाउँहरू र रहस्यमय ठाउँहरू भ्रमण गर्न चाहन्छन्। संसारभरका घुम्न लायक रमणीय ठाउँहरूबारे सबैले सुनेको र थाहा भएको हुनुपर्छ तर केहि यस्तो ठाउँ छ जहाँ पर्यटकहरूलाई निषेध गरिएको छ। रहस्यमय ठाउँ हो नर्थ सेन्टिनल आईल्याण्ड  जहाँ बसोबास गर्ने सेन्टिनेलिस पिपुल आजसम्म पनि आधुनिक दुनियाँसँग सम्पर्क नगरी आफ्नै तरिकाले जीवन बिताइरहेका छन्।

सबैभन्दा रोचक कुरा के हो भने, उनीहरू हजारौँ वर्षदेखि बाहिरी प्रभाव बिना नै आफ्नो संस्कृति जोगाएर बसेका छन्। जब पनि बाहिरी मानिसहरूले उनीहरूसँग सम्पर्क गर्ने प्रयास गरेका छन्, उनीहरूले त्यसलाई अस्वीकार गरेका छन् र आफ्ना परम्परालाई जोगाउन कडा रूपमा प्रतिरोध गरेका छन्। त्यसैले नर्थ सेन्टिनाईललाई विश्वकै सबैभन्दा अलग र रहस्यमय स्थानमध्ये एक मानिन्छ। यो ठाउँले हामीलाई देखाउँछ कि आधुनिक संसारबाट टाढा रहेर पनि मानव जीवन आफ्नै तरिकाले कसरी टिक्न सक्छ।

यो टापु बङ्गालको खाडीमा पर्ने ‘एण्डाम्यान आइल्याण्ड’हरू मध्ये एक हो, जसको क्षेत्रफल लगभग २८ वर्ग किलोमिटर रहेको छ भने यो टापुलाई चारैतर्फबाट कोरल रिफले घेरेको छ। यो टापुमा ४०० जना भन्दा बढी सेन्टिनेलिज बासिन्दाहरू बासस्थान गर्ने गर्दछन्। सेन्टिनेलिज बासिन्दाहरू आफ्नो अलग्य वातावरणलाई धेरै मनपराउँछन् र यो टापुका बासिन्दा मात्रै यस्ता मानिसहरू हुन् जसले आधुनिक युगलाई अस्वीकार गरेका छन्। सन् १९७५ मा, नेशनल जियोग्राफिकका फिल्म निर्देशकले सेन्टिनेलिज बासिन्दाहरूसँग सम्पर्क गर्न खोजेका थिए, तर उनीहरूले निर्देशकलाई घाइते बनाएर पठाएका थिए। त्यस घटना पछि, सन् १९९६ मा भारतीय सरकारले त्यहाँका बासिन्दाहरूसँग सम्पर्क गर्नको लागि मनाही गरेको थियो। यसको मुख्य कारण भनेको त्यहाँका बासिन्दाको सुरक्षा र उनीहरूको जीवनशैलीको संरक्षण हो। बाहिरी मानिससँग सम्पर्क हुँदा उनीहरूलाई रोग लाग्न सक्ने जोखिम अत्यन्तै उच्च हुन्छ, किनभने उनीहरूको शरीर आधुनिक रोगहरूसँग लड्न तयार छैन।

इतिहासमा धेरैपटक मानिसहरूले नर्थ सेन्टिनाईल आईल्याण्डमा पुग्ने प्रयास गरेका छन्, तर प्रायः सबै प्रयास असफल भएका छन्। नर्थ सेन्टिनेलिस पिपुलहरु बाहिरी व्यक्तिहरूप्रति अत्यन्त सतर्क र कहिलेकाहीँ आक्रामक रूपमा प्रतिक्रिया दिने गर्छन्। उनीहरूले आफ्नो क्षेत्र र स्वतन्त्रता जोगाउन बलियो प्रतिरोध देखाएका छन्। रोचक कुरा के हो भने, आधुनिक प्रविधि र विज्ञानले यति धेरै प्रगति गरिसकेको अवस्थामा पनि, यो समुदाय अझै पनि ढुंगे युगजस्तै साधारण उपकरण र परम्परागत तरिकामा जीवन बिताइरहेको मानिन्छ। उनीहरू शिकार र सङ्कलनमा निर्भर छन्, र प्रकृतिसँग गहिरो सम्बन्ध राख्छन्।

यस टापुको रहस्य अझै पूर्ण रूपमा खुल्न सकेको छैन। बाहिरी संसारलाई उनीहरूको भाषा, संस्कृति, जनसंख्या, र दैनिक जीवनबारे धेरै कम जानकारी छ। यही अज्ञानताले त्यो ठाउँलाई अझै रोचक र रहस्यमय बनाएको छ। आजको डिजिटल र जोडिएको दुनियाँमा, जहाँ इन्टरनेटले सबैलाई एकअर्कासँग जोडेको छ, त्यहाँ यस्तो ठाउँको अस्तित्वले हामीलाई सोच्न बाध्य बनाउँछ। के वास्तवमै आधुनिकता नै प्रगतिको एकमात्र बाटो हो? वा, आफ्नै परम्परा र प्रकृतिसँग सन्तुलनमा बाँच्नु पनि उत्तिकै महत्त्वपूर्ण छ?

त्यो आईल्याण्डको जीवनले हामीलाई एउटा गहिरो सन्देश दिन्छ- मानव सभ्यता फरक–फरक तरिकाले विकास हुन सक्छ, र सबैलाई एउटै बाटो अपनाउनु आवश्यक छैन। यसैले, त्यो रहस्यमय स्थान केवल एउटा टापु मात्र होइन, यो मानव इतिहास, स्वतन्त्रता, र रहस्यको जीवित प्रतीक हो। उत्तर सेन्टिनेल टापु केवल एउटा भूगोल मात्र होइन, यो मानव सभ्यताको प्राचीन इतिहासको जीवित दस्तावेज हो। उनीहरूको इच्छाविपरीत उनीहरूको संसारमा हस्तक्षेप गर्नु भनेको एउटा अद्वितीय संस्कृति र मानव विविधतालाई नष्ट गर्नु हो। त्यसैले, यस टापु र यसका बासिन्दाहरूको अस्तित्व, संस्कृति र गोपनीयताको संरक्षण गर्नु नै सम्पूर्ण मानव समाजका लागि उत्तम कदम हुनेछ। (एजेन्सीहरुबाट)